Хақ Тағала Өзіне бойсұнған пендесіне мол игілікті уәде еткен. Бұл Жаратушы Иенің шексіз рақымдылығының белгісі. Болмаса құлдың міндеті – Тәңірінің әмірін орындау ғана.
Жантәсілім сәтіне дейін: «Үмметім! Үмметім»,-деп үмметі-нің қамын жеген Пайғамбарымыз Мухаммад (солләл-лаһу ғаләйһи уә салләм) құлшылық етудің маңыздылығы, соның ішінде намазды жамағатпен оқу жайында ерекше ескерткен. Солардың кейбірін назарларыңызға ұсынуды жөн көрдік.
Расулуллаһ (солләл-лаһу ғаләйһи уә салләм) айтады:
«Алла Тағаланың азаншысы намазға шақырғанын естіп тұрып намазға бармаған адам зұлымдық, күпірлік және екіжүзділік еткен болады».[1]
«Ауыл немесе далада жасаған үш адам намазын жамағат болып оқымаса, оларды шайтан басынады. Намазды жамағатпен оқыңдар! Себебі, бөлінген қойды бөрі жейді».[2]
«Ибн Аббас (родиял-лаһу ъанһу) күндіз ораза ұстап, түнімен намаз оқып, алайда жамағат және жұма намазына келмеген адам жайында сұралғанда: «Оның барар жері - тозақ»,-деді».[3]
Абдуссамад Махат
«Нұр Астана» мешітінің наиб имамы
