Бұл туралы бүгін Бас мүфти Наурызбай қажы Тағанұлының төрағалығымен өткен Қазақстан мұсылмандары діни басқармасының Төралқа мәжілісінде Діни білім және кадр дайындау бөлімінің меңгерушісі Хасан Аманқұл хабарлады.
«Діни оқу-ағарту бағыты бойынша рамазан айында «Хатым Құран» жобасымен күн сайын бесін немесе екінті намазынан кейін 1021 мешітте жамағатпен 1 пара Құран оқылып, 627 391 адам қатысты және әлеуметтік желілерден тікелей эфир жүргізілді. «1 күнде 1 хатым» жобасы аясында Құран оқитын 474 топ құрылып, жалпы саны 8179 хатым оқылды. ҚМДБ-на қарасты медресе-колледж 168 ұстаз бен 2452 студент күніне 1 пара Құран оқып, хатым жасады. Сондай-ақ, еліміздің 769 мешітінде 997 қари күнделікті тарауық намазында Құран Кәрімді хатым етті. Оның ішінде 44 қари – шетелдік.
Оқу-ағарту жұмысы бойынша «Намаз оқып үйренейік» айдарымен 818 мешітте дәрістер жүргізіліп, 8125 адам қамтылды. «Бір айда бір кітап» жобасы аясында рамазан айы ішінде Құран Кәрімнің қазақша мағыналық аудармасын оқу акциясына 4983 адам оқуды бастап, оның 2967-сі толық оқып шықты. Тазалық, намаз, ораза және зекет мәселелерін жамағатқа жан-жақты түсіндіру мақсатында «Пәтуа сағаты» 564 мешітте ұйымдастырылып, 26 248 сұраққа жауап берілді » деді Хасан Ташайұлы.
