Саудадағы алдаудың тағы бір түрі – тауардың кемшілігін жасыру.
Бірде Пайғамбар (оған Алланың игілігі мен сәлемі болсын) астық сатып тұрған бір адамның қасынан өтіп бара жатты. Әлгі адам сатып тұрған астық үйінді болып тұрды және сырт көзбен қарағанда құрғақ әрі өте жақсы болып көрінді. Пайғамбарымыз (оған Алланың игілігі мен сәлемі болсын) қолын дәнге терең салды және оның саусақтары ылғалды сезді. Сонда ол: «Уа астықтың иесі! Бұл не?», - деп сұрады.
Әлгі адам: «Менің дәндеріме жаңбыр тиді», - деп түсіндірді. Пайғамбар (оған Алланың игілігі мен сәлемі болсын): «Ендеше, неліктен сен ылғал дәнді адамдар көру үшін төбенің басына қоймадың?!», - деп сұрады да, кейін: «Алдайтын адамдардың маған еш қатысы жоқ», - деді. Тауардың кемшіліктерін біле тұра, оларды жасыруға болмайды. Олар жайлы сатып алушығы адал түрде айту қажет.
Пайғамбарымыз (оған Алланың игілігі мен сәлемі болсын) сауда мәмілесін жасаған екі адам туралы былай деген: «Егер олар (яғни, сатып алушы мен сатушы) шыншыл болып, бір-біріне (тауардың сапасына және төлемге қатысты) барлық нәрсені түсіндірсе, олардың сауда мәмілесі берекелі болады, ал олар шындықты жасырып, бір-біріне өтірік айтса, онда олардың сауда мәмілесі берекеден айырылады» (хадисті әл-Бухари, 2079 және Муслим, 1532 келтірген).
Өкінішке орай, тауарлардың кемшіліктерін жасыру – өте кең таралған құбылыс. Көбісі мұны табысты сауданың таптырмас шарты деп санайды, ал тауар кемшілігін жасыра алу сауда өнері ретінде қарастырылады. Көкөністер мен жемістерді сатушылар бүлінген тауарды сапалысымен жабады, автокөлік, ұялы телефон, тұрмыстық және электронды техника сатушылар өз тауарларының белгіленген талаптарға сай келмейтінін сатып алушылардан жасырады. Азық-түлік сатушылар өз өнімдерінің нақты шығарылған күнін немесе шынайы өндірушісін, кейде тіпті медициналық стандарттарға сәйкес келмейтінін жасырады. Тауардың кемістігін жасыру арқылы алынған қосымша табыс харам болып табылады және адамға зияннан басқа ештеңе әкелмейді.
материал «Саудагерлерге жолдау» кітабынан алынды,
ummet.kz
