Апат айтып келмейді. Бүгінде республиканың бірқатар өңірлерінде су тасқынынан аймақ тұрғындары зардап шегіп отыр. Осыған байланысты мемлекет деңгейінде көмек көрсету мәселесі көтерілді.
Қазақстан мұсылмандары діни басқармасы да табиғат апатынан қиындыққа ұшыраған отбасыларға гуманитарлық көмек жіберу ісін қолға алды. Бүгін бас мүфти тапсырмасы аясында «Нұр Астана» орталық мешітінен Ақмола облысы Атбасар ауданында су тасқынынан зардап шеккен отбасыларға "Қайырымдылық керуені" аясында "Астана асары" жөнелтілді.
Қазақстан мұсылмандары діни басқармасының наиб мүфтиі, Астана қаласының бас имамы Наурызбай қажы Тағанұлы аталмыш шараның маңызды екенін айтты. «Еліміздің кей өңірлерінде өзен сулары тасып, салдарынан халық зардап шекті. Бұл – барша қазақ халқының қабырғасына батады. Осындай қиындық кезде қолдап, көп болып көтеріп, демеу көрсету мұсылмандық міндетіміз әрі қазақы салтымыз. Көршісі аш отырып, түтін түтетпеген халықпыз. Жұмыла көтерген жүк жеңіл дейді. Біз барша астаналықтарды, мешіт жамағатын осы сауапты іске жұмылдырдық. Нәтижесінде, 4 тонна азық-түлік, 1 тонна киім-кешек және 1 миллион теңге шамасында қаржылай жиылды. Алла Тағала ел мен жердің амандығын, тыныштығын нәсіп еткей. Отандастарымызды сабырға шақырамыз, қолдан келген көмекті аянбаймыз. Алла жар болғай» деді наиб мүфти Н.Тағанұлы.
«Нұр Астана» орталық
мешітінің баспасөз қызметі
