Шағбан айы шамасы келген мұсылманға көптеп нәпіл ораза ұстайтын ай. Пайғамбарымыз (с.ғ.с) өзге айлардан гөрі осы Шағбан айында көбірек ораза ұстайтын болған.
Сахаба Усама ибн Зәйд оныңсебебін сұрағанда Ол (с.ғ.с): «Бұл айда барлық істер әлемдердің Раббысына көтеріледі. Менің де істерім Алланың құзырына аузым берік болған күйде көтерілуін қалаймын», - деп жауап берген екен [1].
Дегенмен, қанша күн әрі қай күндері ораза ұстау керектігі риуаяттарда нақты айтылмаған. Сондықтан да, қанша күн ұстаймын десеңіз де өз еркіңіз. Мәселен, дүйсенбі мен бейсенбі күндері ауыз бекітсеңіз болады. Сондай-ақ, Шағбан айының 13, 14, 15 күндері, яғни, «үш ақ күндері» ораза ұстаған дұрыс. Әсіресе, Шағбан айының 15 күні (Бәраат күні) күндіз ораза ұстап (28-наурыз), түнін (29-наурыз) ғибадатпен өткізгеннің сауабы мол.
Бір «әлсіз хадисте» былай делінген: «Шағбан айының ортасы болғанда түнін ғибадатпен, ал күндізін оразамен өткізіңдер. Алла Тағала сол күні күн батқанда дүние аспанына түседі де былай дейді: «Менен кешірім тілейтін пенде бар ма, кешірім етейін? Менен ризық-несібе тілейтін пенде бар ма, ризығын арттырайын? Ауру-сырқауға шалдыққан бар ма, саулық берейін?» т.б. осылай таң атқанша жалғасады»[2].
Осы тұрғыда, кейбір мұсылмандардың өткен Рамазан айынан өтелмей қалған қаза оразалары болса, осы айды пайдаланып, соларды да өтеп алғандары абзал.
Алла жасаған құлшылықтарыңызды қабыл еткей!
[1] Нәсәи – 2357 хадис
[2] Ибн Мәжә: Сүнән - №1388 хадис
ummet.kz
