Бүгін күллі мұсылман қауымының ұлық мейрамы – Ораза айт басталды.
Дін мен дәстүрді ұштастыра білген мешіт ұжымы Ораза айт мейрамына ерекше дайындалды. Жылдағы үрдіс бойынша мешіт ауласында арқан тарту, асық ату, қол күресі мен кір тасын көтеруден сайыстар өткізілді. Қол күрес ұлттық спортынан 80 келіге дейін және 80 келіден жоғары 2 категория бойынша сайыс өтті. Арқан тарту сайысына барлығы 10 команда қатысып, алғашқы үздік деп танылған 3 командаға мешіт ұжымы атынан бағалы сыйлықтар берілді. Асық ату ұлттық спорт сайысына 18 жасқа дейін және 18 жастан жоғары 2 топтың арасында сайыс өтті. Сондай-ақ, күш атасын танымайтын нағыз жігіттер арасында 16 келі кір тасын көтеруден жарыс болды.
Ораза айт мерекесіне орай ұйымдастырылған спорттық ойындарға мешіт жамағаты мен қала қонақтары белсене қатысса, жиналған қауым тартысты ойынды тамашалап, қатысушыларға қолдау білдірді. Сайыс жеңімпаздарын мешіттің Бас имамы Нұрлан Рамазанов бағалы сыйлықтармен марапаттады.
ummet.kz
