«Нұр Астана» мешітінде Наурызбай Тағанұлы жұма уағызын айтты (ФОТО+ВИДЕО)

Күндердің сұлтаны болған қасиетті жұмада «Нұр Астана» мешітінің жамағатымен жүздесіп, тілдесу үшін арнайы ат басын бұрған ҚМДБ-ның бірінші наиб мүфтиі Наурызбай қажы Тағанұлы салиқалы ұрпақ тәрбиелеудің мән-маңызына тоқталды.

Ұрпақ тәрбиесі қай кезеңде болмасын, қай елде болмасын ұлт болашағының бірден-бір негізі. Келер нәсілдің тәрбиесіне отбасы - ошақ қасынан бастап, қоршаған орта, қоғам түгел жауапты. Дегенмен, кейде отбасында ескерілуі керек қарапайым қағидаттарға мән берілмей, «жас шыбық қисық бітіп», талай ата-ана «әттең-ай» деп санын соғып жатады.

Наурызбай қажы Тағанұлы отбасы ішінде бала тәрбиесінде маңызды орны бар қарым-қатынас ережелеріне тоқталып өтті.

«Бала тәрбиесінде ескерілуі тиіс мәселелер: 

• Біріншіден, оған сөзбен емес, іспен үлгі болу. «Айтпа – көрсет, үндеме – үйрет» деген принцип осындайда ауадай қажет. 
• Екіншіден, жұмсақтық қажет. Бала ата-анасынан жылулық сезінбейінше, оның бойында мейірім-махаббат оянбайды. 
• Үшіншіден, кейде қаталдық та қажет. Қатал болғанда да өз орнымен. «Қатал бол, бірақ қатыгез болма» деген тұжырым бар. Ол өзінің әдепсіз әрекеті үшін әкесінің ашуланатынын білуі керек. 
• Төртіншіден, баламен үлкен адамдарша пікірлесу, сөйлесу ләзім. 
• Бесіншіден, бала тәрбиесімен жүйелі түрде айналысу қажет. Аптасына бір уақытты арнау – оның тәрбиесін жүйелі қадағалауға мүмкіндік береді. 
• Алтыншы, оның қолымен қайырлы істерді жасау. 
• Жетінші, сыйлық беру. Сыйлық – кез келген жүректі жібітеді. 
• Сегізінші, дұғагөйлік. Игі ұрпақты, құлшылығы мен тіршілігі үйлескен үлгілі баланы Алладан тілеу – әр мұсылманның міндеті. 
• Тоғызыншы, балаларды алаламау, бәріне бірдей қарау, бірдей көңіл бөлу қажет»,

- деді дәстүрімізбен өрілген дініміздің өнегесін тілге тиек еткен наиб мүфти.

Намаз соңында, жұма уағызына тәнті болған мешіт жамағаты наиб мүфтиге дән ризашылықтарын білдірді.