Білімді әйел күйеуінің қателігін бетіне басады, “Мен саған осылай болады деп айттым ғой”, “әне, менің айтқаным келді”, т.б деп реніш тудырады. Сөйтіп, ақырын-ақырын күйеуінің өз-өзіне деген сенімділігін, алға жылжуға, табысты болуға деген талпынысын құрта береді.
Ал дана әйел ештеңе байқамағандай сыңай танытып, күйеуін қолдап, демеп жібереді.
Білімді әйел үйде сәл ақша жетіспеушілігі, дағдарыс туа қалса, тізгінді өз қолына алып, күйеуіне ақша табуды, дұрыс өмір сүруді үйретеді. Ал дана әйел әлдекім арқылы күйеуіне ақша табудың көздерін көрсетіп, өзі үйде оны қолдап, жағдайын жасап отырады.
Білімді әйел балаларының бәрін өзі сүйетін, өзіне ұнайтын бағытқа қарай тәрбиелейді. Ал дана әйел әркімнің қызығушылығы мен қабілетін ескере отырып, әрқайсысынан жеке тұлға тәрбиелеп шығарады.
Білімді әйел жұмысын жоғары деңгейде, еш қатесіз орындауға тырысады. Өзгелерге де сол талапты қояды. Ал дана әйел өзінің нәзіктігін ұмытпай, айналасына жылулық пен махаббатты, мейірімді төге жүреді.
Білімді әйел өзінің пікірінің дұрыс екенін дәлелдеумен болады. Ал дана әйел үндемей тыңдап, келісе жүріп дұрыс болған істі жасайды. Әрі өзінің әйелдік міндеттерін мәжбүрлікпен емес, махаббатпен орындайды.
Білімді әйел әлемді өзгерткісі келеді, адамдарды дұрыстағысы, түзеткісі келеді. Ал дана әйел өзін өзгертіп, өзін дамыта түседі. Көңілді болуға, ешкімге ренжімеуге, жүрегін кірден тазартуға бел буады. Ал адамдарды қалай бар, солай еш ренішсіз қабылдай алады. Ешкімді бөліп-жармайды.
Білімді әйел кімдікі дұрыс болса, сол бақытты болады деп ойлайды. Ал дана әйел кім бақытты болса, соның бағыты дұрыс деген шешім қабылдайды.
Білімді әйел мен дана әйелдің айырмашылығы, міне, осында.
Білімді болу, ақылды болу әркімнің-ақ қолынан келеді, алайда, дана болу – ақылмен, көркем мінезбен әрекет ететін нағыз әйелге ғана тән қабілет екенін ұмытпайық! Алла білімімізді даналықпен жұмсауды нәсіп етсін!
ummet.kz
