21 қазан. Нұр-Сұлтан. Ummet.kz – Елорда төрінде орналасқан «Нұр Астана» мешіті ауласындағы жөндеу жұмыстары қайта жанданды, деп хабарлайды ummet.kz тілшісі.
Бұған дейін хабарлағанымыздай «Нұр Астана» мешітінің шатыры, мұнарасы мен қабырғаларына күрделі жөндеу жұмыстары жүргізілген еді. Карантин кезінде тоқтап қалған құрылыс жұмысы демеушілер мен жанашыр азаматтардың қолдауымен қарқын алды. Қазір құлшылық үйінің сырты мен ауласы жаңаша түрленіп, көркейе түсті және жаңа дыбыс күшейткіштермен (колонка) жабдықталды.
«Нұр Астана» мешітіне қарасты оқу ғимараттары мен қасапхананың да іші-сырты толықтай жаңартылды.
Сондай-ақ, жамағатқа адал ас ішуге мүмкіндік жасалып, мешіт жанынан ҚМДБ халал сертификатымен жұмыс істейтін «Мұмтаз» асханасының ашылғанын хабарлаймыз.
Құранда Алла тағала «Расында Алланың мешіттерін Аллаға және ақырет күніне иман келтірген, сондай-ақ намаз оқып, зекет берген және тек Алладан қорқатын (пенде) ғана тұрғызады. Міне, олар шын мәнінде тура жол тапқандар» деп, құлшылық үйін салдырушылар мен құрылысына демеу көрсетушілерді сүйіншілейді.
Біз де «Нұр Астана» мешітінің әкімшілігі мен ұжымының атынан қолдау көрсеткен барша атымтай жомарттарға алғыс білдіреміз.
