Қадірлі ағайын, ардақты қазақ елі!
Наурыз мерекесі – ұлт пен ұлыстар арасындағы келісімнің, сыйластықтың, құрмет пен сүйіспеншіліктің дәнекері, еліміздің ынтымақты тірлігінің, береке-бірлігінің, өшпес өнегесінің белгісі. Күн мен түннің теңеліп, айнала көкке оранатын күнді халқымыз жыл басы санап, ұлықтап, құрметтеген.
Ғасырлар қойнауынан жетіп, сабақтастығын үзбеген әз-Наурыз мерекесінің орны Қазақстан халқы үшін қашанда ерекше. Қараның аққа, жоқтың барға, ызғарлы күннің жылы маусымға ауысар сәтінде барша жұрт бір-біріне игі тілектерін айтып, өкпе-реніштерін кешірген. Имандылыққа ұйыған ізгі жандар қайырымдылық жасауды дәстүрге айналдырған.
Адамзатты татулық пен мейірімділікке жетелеген Ұлыс күні баршаңызға қуаныш пен шаттық, сарқылмас бақ, таусылмас қажыр-қайрат тілеймін! Жаратушы Алла тағала ағайынның ауызбіршілігін арттырып, ынтымақты ел болуымызды жазғай. Ұлыстың ұлы күні елімізге құтты-берекелі болсын.
Наурызбай қажы ТАҒАНҰЛЫ,
ҚМДБ наиб мүфтиі
