Дініңе ықыласпен қарасаң, аз амал да жетеді. Алла Тағалаға ұнамды болған іс – аз да болса үзілмей, жалғасы табылған іс.
Жүрегіңді Аллаға деген махаббатқа толтыратын істерге күніне 15-20 минут уақытыңды бөл. Дауысы құлаққа жағымды қариды тауып алып Құран тыңда, сөздері әсерлі уағызшының насихаттарына құлақ сал. Уақытыңды тиімді пайдаланып үйрен. Жұмысыңа немесе сабағыңа баратын жолда немесе көлікте, кезекте тұрғанда, тіпті ұйықтар алдындағы уақытты тиімді пайдалана біл.
Қысқа ғана уағыз-насихаттарды, пайғамбарлар мен сахабалар қиссасын, салиқалы құлдар жайлы болған оқиғаларды оқы немесе тыңда. Осы секілді әдеттерге ұқыпты болсаң, өмірің өзгереді. Жақсылықтарың артып, жүрегің жібиді. Жаратушыға деген махаббатың артады әрі осының барлығы сені намаз оқуға итермелейді. Құранда: «Ескерт! Расында, ескерту мұсылмандарға пайда береді!» – демей ме?
Сенің намаз оқымауыңның бір себебі – Алла жайлы көп нәрсені білмеуіңде. Саған айтарым, күніне шын жүрегіңмен Алланы еске алуға 5 минутыңды арна. Алланы тыныш жерде асықпай, айтып жатқан сөзіңді түсініп отырған күйде есіңе ал. Бұл амалды сабырмен, кемеліне келтіріп жасап көр. Есіңде болсын, амалдың көптігі емес сапалы түрде орындалғаны маңызды.
Егер осы көп уақыт пен үлкен күшті талап етпейтін қарапайым амалдарды сақтап қалуға тырыссаң, руханиятың азықтанып, қуаттанады. Шайтан-нәпсінің азғыруына қарсы тұруға көмек береді. Ағзаның азығы тамақ болғанындай, рухтың азығы да Алланы еске алу. Бір парақшаға мына аятты жазып қойсаң болады: Алла Тағаланы еске түсіретін дүниелерді оқуды немесе тындауды ұмытып кетпес үшін бөлмеңе немесе көлігіңе, тіпті телефонның фонына қойып қой. Біраз уақыт өткеннен кейін өміріңдегі өзгерістерді сезінесің. Бұл әдіс – намазына берік болғандар мен жүректері мешітке байланғандардың бір сыры.
материал «Мүмкіндік» кітабынан алынды,
ummet.kz
