Адам ауырса шипаға, қиындыққа ұшыраса қорғанға, құтқарушыға, қарызға батса, ақшадан тарықса байлыққа, қателессе тәубеге мұқтаж. Және мұның бәрі де адамға уайым-қайғы сыйлайды. Жүрегінің тыныштығын алады. Ой мен жүрек тыныш болмаса, барлық нәрсенің берекесі қашады. Мұндай жағдайда мұсылман сондай бақытты жаратылыс! Ол кез-келген қиындықта қолын жайып, бойсұнып Алладан сұраса, мұқтаждығы өтеледі. Ал мына дұғаны оқыған адамға Алла Тағала молынан сауап жазады.
Әбу Дәудтің «Сунән» атты хадис жинағындағы бір хадис-шәріпте Пайғамбарымыз (оған Алланың игілігі мен сәлемі болсын) осы дұға туралы былай деген: «Кімде-кім таңертең және кешке осы дұғаны оқитын болса, оны Өзіне разы ету Алла Тағалаға тиесілі іс болады (яғни, Алла Тағала оған молынан сауап жазады да, ол Аллаға разы болады)». Сондай-ақ, осы дұғаға қатысты Ахмәд ибн Ханбәлдің «Муснәд» атты хадис жинағындағы бір хадисте Пайғамбарымыз (оған Алланың игілігі мен сәлемі болсын) былай деген: «Кімде-кім азаншының дауысын естіген кезде осы дұғаны оқыса, күнәлары кешіріледі».
رَضِيتُ بِاللَّهِ رَبًّا ، وَبِالْإِسْلَامِ دِينًا ، وَبِمُحَمَّدٍ رَسُولًا
Оқылуы: «Радыйиту билләһи Раббә уә бил-Исләәми диинә уә би Мухаммәдин нәбийә...»
Мағынасы: «Раббы ретінде Аллаға, дін ретінде Исламға және пайғамбар ретінде Мұхаммедке (оған Алланың игілігі мен сәлемі болсын) разы болдым...»
ummet.kz
