Кеше Қазақстан және Өзбекстан мұсылмандары діни басқармалары Ташкент қаласында өзара ынтымақтастық туралы Меморандум қабылдады.
Бас мүфти Серікбай қажы Ораздың Өзбекстанға жасаған ресми сапары барысында екі елдің мүфтилері дін саласындағы ұзақмерзімді ынтымақтастықты орнатуға арналған құжатқа қол қойды.
Меморандум Қазақстан мен Өзбекстан арасындағы достық қарым-қатынасты одан әрі нығайтуды, екі елге ортақ діни мектепті жаңғыртуды, бірізді пәтуалар шығаруды, мәдени-рухани байланысты арттыруды, тәжірибе алмасуды, ғылыми жобаларды жүзеге асыруды, дін қызметкерлерінің біліктілігін көтеруді көздейді.
Меморандум негізінде Тараптар бір-біріне халықаралық деңгейде өзара көмек пен қолдау көрсетуге міндеттеледі. Ынтымақтастық шеңберінде екі елдің болашақ ұрпағына патриотизм мен бейбітшілік құндылықтары насихатталып, Исламның рухани баға жетпес мұрасы мен мәдениеті дәріптеледі.
Аталған ынтымақтастық Құранға, хадистерге және ханафи мазхабының іліміне, Қазақстан және Өзбекстан Республикасының халықаралық міндеттемелері мен ұлттық заңнамаларына негізделеді.
Сонымен қатар азаматтардың екі ел аумағында орналасқан тарихи қасиетті жерлерге зиярат етуі қамтамасыз етіледі.
Тараптар бекітілген діни пәтуалар негізінде діни мерекелерді Һижри жыл санауы бойынша бірізді өткізуді қолға алады.
