ҚМДБ Төрағасы, бас мүфти Наурызбай қажы Тағанұлының бастамасымен су басқан өңірлерге көмек беру үшін республиканың барлық орталық мешіттерінде қайырымдылық жәрмеңкесі ұйымдастырылған болатын. «Әбу Насыр әл-Фараби» мешітінде де «Жақсылықта жарысайық» қайырымдылық жәрмеңкесі өткізілді.
Қайырымдылық жасауды көздеген жәрмеңкеге мешіт ұстазы Әйкерім Қадыл мен мешіт жанындағы «Жібек» қыз-келіншектер клубы, қыз балалардан құралған шәкірттер толықтай атсалысты.
Жәрмеңкеде жамағатқа үй тағамдары, түрлі тәттілер, күнделікті қажетті тұрмыстық діни заттар, ұсынылды. Қайырымдылықтан жиналған қаржы толығымен су тасқынынан зардап шеккен облыстарға гуманитарлық көмекке жұмсалады.
Ардақты Пайғамбарымыздың (с.ғ.с): «Адамдардың ең қайырлысы – өзгеге пайдасы тигені» деген ізгі өсиетіне амал еткен мешіт шәкірттері осындай қайырымдылық жәрмеңкелерін ай сайын, апта сайын өткізіп келеді. Сол дәстүрлі ізбен алдағы уақытта да осындай ізгі шараларды ұйымдастыруды жоспарлап отыр.
ummet.kz
