2 сәуір. Нұр-Сұлтан. Ummet.kz – Кеше республикалық «Әзірет Сұлтан» мешітінде Нұр-Сұлтан қаласы өкілдігінің жалпы жиналысы болып өтті, деп хабарлайды muslim.kz сайтына сілтеме жасаған ummet.kz тілшісі.
ҚМДБ төрағасының бірінші орынбасары, наиб мүфти Наурызбай қажы Тағанұлының төрағалығымен өткен жиналыста «Діни Жібек жолы. Ислам және жастар: қазіргі заманның сын-қатерлері» атты IV Халықаралық ғылыми-діни конференцияға дайындық жұмыстары талқыланып, бірқатар нақты тапсырмалар берілді.
Айта кетейік, 10-12 сәуір күндері Нұр-Сұлтан қаласында өтетін айтулы шара аясында көршілес Ресей елінің, Орта Азия мемлекеттерінің мұсылман ғалымдары, дін көшбасшылары бас қосады. Үш күнге созылатын Халықаралық конференцияның жұмыс жоспарында бірнеше іргелі іс-шара көзделген.
Елордамыздағы 10 құлшылық ордасының бас имамдары мен «Астана» медресе-колледжінің басшылығы қатысқан бүгінгі жиналыста жоспарға сәйкес тапсырмалар беріліп, жауаптылар бекітілді.
ҚМДБ-ның Нұр-Сұлтан қаласындағы жаңа ғимаратында өтетін Халықаралық жиынның маңыздылығын атап өткен Наурызбай қажы Тағанұлы барша қызметкерлерді аянбай атсалысуға шақырды. Халықаралық деңгейдегі конференция жұмысының ойдағыдай өтуі тек ҚМДБ-ның ғана емес, еліміздің де абырой-беделін биіктете түсетінін ескерте кетті.
