Ер кісіге төрт әйелге дейін алуға рұқсат. Және бір әйелі бар адам екінші әйел аларда бұған бірінші әйелінің келісімі шарт емес. Міне осындай ер кісі егер екі яки төртке дейін әйел алатын болса, бұлардың бәрін бірдей әділдікпен қарауға мәжбүр. Әйтсе де ер кісінің бірнеше әйеліне бірдей толық әділдік жасауда қиналуы мүмкін.
Құранда: «Қанша қаласаңдар да әйелдер арасында әділ болуға шамаларың жетпейді. Ендеше біреуіне мүлде ауып кетіп, өзгесін жіпсіз байлағандай етіп қоймаңдар», – дейді. Иә, ер әйелдеріне нәпақа жағынан әділдік жасай алуы мүмкін. Бірақ кейде өзгелеріне қарағанда біреуін қатты жақсы көріп, соған қатты көңіл бөлуі мүмкін.
Мұндай жағдайда отбасының әділдік жүйесі қиынға соғады. Шафиғилардан тыс көптеген ғалымдардың көзқарасына қарай, ердің әйелдері арасында түнеу үлесінде де әділдік жасауы уәжіп. Бұл жерде бір әйелі кәрі, бір жас немесе бірі мұсылман енді бірі христиан болуы шарт емес. Хазіреті Айша: «Алла елшісі (аләйһис-саләту уәс-сәләм) әйелдері арасында күндерді бөліп, әр әйелі үшін арнайы бір күн бір түн айқындады», – дейді.
Пайғамбарымыз бір хадисінде: «Екі әйелі бар ер адам біреуіне бет бұрып, екіншісіне немқұрайлы қараса, қиямет күнінде бір жағы қисайып тұрады», – дейді. Сондықтан Құран төрт әйел алуға есік ашқанымен жүгі ауыр болғандықтан жалғыз әйел алуға ынталандырып: «Әділетсіздік жасаудан қорықсаңдар біреуін ғана алыңдар», – дейді.
Ислам дінінде көп әйел алу – парыз, уәжіп, яки сүннет түрінен емес, берілген рұқсат қана. Әсіресе кейде бір елде соғыстан соң көптеген әйелдер жесір, қыздар жетім қалуы мүмкін. Яки қоғамда халық саны азайып кетуі де мүмкін. Мінекей осындай жағдайда көп әйел алудың демографияға қосар үлесі мол. Сондай-ақ кейде бір ердің әйелі жазылмас дертке шалдығуы мүмкін.
Егер бір әйел ғана болуы керек деп шектелетін болсақ ері зинаның құрығына шалынуы ықтимал. Егер ажырасатын болса, әйелдің тағдыры қиынға соғады. Һәм кейде бір-біріне ынтызар болған екі ғашық қосылғанда әйелі бедеу болуы мүмкін. Ал ерінің бала сүйіп, ұрпағым болса деп армандайды.
Міне осындай жағдайда ер кісі екінші әйел алатын болса кейінгі әйелі науқас әйеліне қамқор болса, ердің кейінгі әйелінен туған бала екі әйелге де ортақ бала болып қалмақ. Бұдан басқа да хикметтер бар.
материал «Отбасы ғылымхалы» кітабынан алынды
ummet.kz
