Бүгін барша мұсылман халқы қасиетті Қадір түнін қарсы алады. Мың айдан да қайырлы сағаттарды қалай өткізу керек? Құлшылықтың сауабы кімдерге беріледі? Тағдырлар айқындалатын бұл түні не істеу керек?
1)Намаз оқу:
Қадір түні күн батқанда басталып таң атқанға дейін жалғасады. Сауаптар еселенсін десеңіз шам, құптан, тарауық, таң намазын жамағатпен оқыған абзал. Намазға әлі жығылмаған ба едіңіз? Имамға ұйып, көпшіліктің істегенін қайталасаңыз, намаздың сауабы сізге де беріледі.
2)Құран Кәрімді оқу:
Зікірдің ең жақсы түрі – Құран аяттары мен сүрелерін оқу. Хадисте «Құран оқыңыздар! Расында, Қиямет күні ол өзін оқығанға шапағатшы ретінде келеді» дейді. Қасиетті кітаптың аудармасына мән беріп, мағынасына ой жүгірткен абзал. Абдулла ибн Масғуд риуаят еткен хадис-шарифте Пайғамбарымыз (с.ғ.с) былай деген: «Құраннан бір әріп оқыған адамға бір жақсылық жазылады. Ал әрбір жақсылықтың сауабы он еселенеді. Мен «Әлиф, ләм, мим» бір әріп деп айтпаймын. Әлиф – бір әріп, ләм – бір әріп, мим – бір әріп»
3)Тәубеге келу:
«Шын ниетпен қылған тәубе таудай күнәні жояды» деген екен ата-бабаларымыз. Құранда Алла тағала былай дейді: «Әй, мүміндер, түгел Аллаға тәубе қылыңдар! Әрине құтыласыңдар» («Нұр» сүресі, 31-аят); «Раббы-ларыңнан жарылқау тілеңдер. Сонан соң оған тәубе етіңдер» («Һұд» сүресі, 3-аят); «Әй, мүміндер! Аллаға шынайы тәубе қылыңдар» («Тахрим» сүресі, 8-аят).
Тәубе жасаудың шарттары:
- Күнәдан лезде тиылу;
- Бар жүрегімен қателігіне өкініп, Алладан кешірім сұрау;
- Күнәні қайта жасамауға бел буу;
4)Зікір ету
Зікірдің көп түрі бар. Мәселен:
- Кімде-кім тілге жеңіл, таразыда ауыр тартатын «Субханаллаһи уә бихамдиһи, субханаллаһил азим» деп 100 рет қайталаса, оның күнәлары теңіз көбігіндей көп болса да кешіріледі.
- «Лә иләһә илләЛлаһ» деп көп айту керек
- «Астағфирулла», «Субханалла», «Әлхамдулилла», «Аллаһу әкбар» сынды зікірлерді айтудан жалықпаңыз
5)Қадір түніндегі дұғаны оқу:
Айша (р.а) анамыз алла елшісінен (с.а.у) «Егер Қадір түніне дәл түссем, онда қандай дұға айтайын» деп сұрайды. Пайғамбарымыз (с.а.у) сонда: Мына дүғаны оқы: Аллаһумма иннәкә ғафуун к тухиббул ғафуә фағфу ғанни» деп жауап береді. Мағынасы: «Я, Алла, расында Сен – кешірімдісің, кешіруді жақсы көресің, мені кешіре гөр!»
6)Дұға жасау
Алла Тағала дұғаларды қабыл ететін Қадыр түні мүмкіндігінше көп уақытты дұғада өткізу керек, себебі біз Оған мұқтажбыз. Атақты хадисші Суфуан Сәури өзінің бір сөзінде: «Бұл түні дұға етіп, Алладан кешірім сұрап, тілек тілеу мен үшін намаз оқудан қайырлы. Егер Құран оқып, артынша дұға етіп отырса тіптен жақсы» деген. Себебі, бұл түн - Аллаға көптеп дұға ететін, кешірім тілейтін түн.
7)Пайғамбарымызға (с.а.у) салауат айту
Пайғамбарымыз (с.ғ.с.): «Әрбір дұға-тілек аспан астында бүркеліп тұрады. Егер маған айтылған салауат келсе дұға көкке көтеріледі» деген. Салауат айту – дұға-тілектің қабыл болуына үлкен себепкер. Сондай-ақ, Хадисте былай айтылған: «Маған бір рет салауат айтқан кісіге Алла Тағала он сауап жазады».
Салауаттың түрлері көп. Ең қысқасы Пайғамбарымыз есімін естігенде «алейһис соләту уәс сәләм» немесе «салла Аллаһу алейһи уәс-сәләм» деп айту. Риуаятта сахабалар пайғамбарымыздан (с.ғ.с.) «Уа, Алла елшісі! Сізге қалай салауат айтамыз?»дегенде Пайғамбар (с.ғ.с.): «Аллоһумма солли ала Мұхаммадин уә әзуәжиһи уә зурриятиһи, кәмә солләйтә ала әли Ибраһимә, уә бәрик ала Мұхаммәдин уә әзуәжиһи уә зурриятиһи, кәмә бәрактә ала әли Ибраһимә, иннәкә Хамидум Мажид» деп айтыңдар деген екен.
Мағынасы: Аллаһым, Мұхаммедке, оның жұбайлары мен ұрпағына Ибраһим отбасына салауат еткендей рақымет ет. Және Мұхаммедке, оның жұбайлары мен ұрпағына Ибраһим отбасына берекет еткеніңдей береке бер. Расында, Сен Хамид (мақтаулысың) Мажид (даңқтысың).
Салауаттың ең көп айтылатын түрі намазда оқылатын «Аллоһуммә солли» және «Аллоһуммә бәрик» салауаттары:
«Аллоһуммә солли ала Мұхаммадин уә ала әли Мұхаммадин кәмә солләйтә ала Ибраһимә уә ала әли Ибраһимә иннәкә Хамидум Мажид».
«Аллоһуммә бәрик ала Мұхаммадин уә ала әли Мұхаммадин кәмә бәрактә ала Ибраһимә уә ала әли Ибраһимә иннәкә Хамидум Мажид».
7) Садақа беру
Ислам ғұламалары адамдардың бір-біріне қарайласа жүруінің рухани пайдасы зор екенін алға тартады. Пайғамбарымыз (с.а.у) мұсылмандардың періштедей пәк күйге бөленуі үшін садақа беруден тартынбауға үндеген. «Бір құрма болса да садақа беріңіз. Өйткені (садақа) кедейді қуандырады, сондай-ақ, судың отты өшіргені секілді, (садақа) күнәларыңызды жоқ қылады» деген хадис-шариф, садақа берудің мұсылмандардың рухани тазаруына жол ашатын ізгі амал екенін әйгілеуде.
Құрметті, мұсылман бауырлар, осы игі амалдарды орындау арқылы Қадір түнінде 83 жылдық сауапқа кенелейік! Баршамызға Алла жар болсын!
ummet.kz рухани-ағарту порталы
