Рамазан айы – жақсылық жасауда жарысатын ай. Тағат-құлшылықтарды арттыратын ай. Бұл айда сауаптар еселенеді, Дәрежелер көтерілетін ай.
Рамазан айында мүмін-мұсылманның қапы қалмау керек ісінің бірі – садақа. Өйткені садақа екі дүниеде де пайдасы мол сауапты іс, ал Рамазан айында оның сауабы, өзге айларға қарағанда еселене түспек.
Имам Тирмизи риуаят еткен хадисте: «Ең абзал садақа – Рмазан айында берілгені» делінген. Пайғамбарымыз (оған Алланың салауаты мен сәлемі болсын) Рамазан айында басқа айдан да жомарт бола түсетін. Кез келген затты адамдардың сұрауынсыз беретін (Имам Ахмад риуаят еткен).
Рамазан айы – кешірім мен мейірімділік, жомарттық пен сый-сияпатқа толы мерекелі ай болғандықтан Алла Тағала қайырымды жанды мейіріміне бөлейді. Кедейге көмек қолын созғанды кеңдігімен жарылқайды. Жомарттық жасағанды шексіз нығметке кенелтеді.
Пайғамбарымыз (с.а.у.) жомарт еді. Ал Рамазан айында мүлдем жомарттығы арта түсетін болған. Абдулла ибн Аббас бұл жайында былай деп тілге алады:
«Алланың Расулі адамдардың ең жомарты еді. Ал жомарттығы Рамазан айында одан сайын артатын...» (Имам Бұхари: «Сахих Бұхари»).
Алла елшісінің (с.а.у.) Рамазан айында садақа беруді көбейтуі – бұл айда садақа берудің өзге айларға қарағанда сауабы мол әрі пайдасы көп екендігіне дәлел. «Жарты құрмамен болса да өздеріңді тозақтан аман алып қалыңдар» - деп ардақты Пайғамбарымыз (с.а.у.) айтқандай, Рамазан айында шама-шарқымызша садақа беріп, сауабымызды еселеп алалық.
материал «Ораза: әдебі мен міндеттері» кітабынан алынды,
ummet.kz
