Кез келген маңызды іс дайындықты талап етеді. Мұсылман адам Құран түсірілген, күнәлардың кешірілуіне себепші болатын, жәннат есіктері ашылып, тозақ есіктері жабылатын, шайтандар кісенделетін, жылына бір мәрте ғана келетін Рамазан атты ұлық айдың келуіне үлкен дайындықпен қадам басқан жөн.
Пайғамбарымыз (оған Алланың салауаты мен сәлемі болсын): «Шын мәнінде амалдар тек қана ниеттерге байланысты және әр кісіге ниет еткені тиесілі» деп айтқанындай, қасиетті Рамазан айы жақындауымен мұсылман адам ниетін жаңартып, ұлық айда ораза ұстаумен қатар нәпіл намаздар оқып, мұқтаж жандарға жәрдемдесу, өз бойындағы кемшіліктерді түзету, Құранды толықтай хатым ету, адамдармен жақсы мәміледе болу сияқты ізгі амалдарды атқаруды көздегені дұрыс.
Рамазан айын іштей дайындалу қажет болғанындай, адам сыртқы амалдармен де дайындалып, нәпіл оразаларын көбейткені хош көріледі. Пайғамбарымыз да (оған Алланың салауаты мен сәлемі болсын) Рамазан айы қарсаңында осылай істейтін еді.
Мысалы, Айша анамыздан (Алла оған разы болсын) жеткен хадисте: «Пайғамбар (оған Алланың салауаты мен сәлемі болсын) ешбір айда Шағбан айында ораза тұтқанындай көп ораза тұтқан емес», - делінген (Муслим, (176).
материал «Ислам әдептерінің энциклопедиясы» кітабынан алынды,
ummet.kz
