Әйел кісі намаз оқитын кезде, үстіне киетін киімі жабылуы тиіс жерлерді жауып қана қоймай, мынадай да талаптарға сай келуі ләзім:
- Денесі көрінетіндей жұқа болмауы тиіс
- Кең-мол болуы қажет. Дене-бітімін бедерлеп тұратындай тырысып тұрмауы керек.
Әбу Дәуідтің хадистер жинағында келтірілген бір риуаятта Пайғамбарымыздың жұбайы Үмму Сәләмәдан бір әйел кісі: «Әйел намаз оқығанда қандай киім кию керек? - деп сұрайды. Оған Үмму Сәләмә (р.а.): «Намаз оқыған әйел басына Орамал, (ал үстіне) аяғының үстінгі жағын жауып тұратындай ұзын, әрі кең көйлек киеді, - деп жауап берген екен.
Үмму Сәләмәның өзі Пайғамбарымыздан (с.а.у.) осы жайында:
- Әйел адам намаз оқығанда изарды орамай (изар - белінен төменгі жағын орап жабатын киім), тек басындағы орамалымен және ұзын көйлегімен оқыса бола ма», - деп сұрайды. Сонда Алланың елшісі:
- Егер көйлек аяғынын үстінгі жағын жауып тұратындай ұзын әрі кең болса онда болады – деген екен.
Қазіргі таңдағы қыздардың киетін шалбарлары көбіне дене-бітімін бедерлеп тұратындай тар боп келеді. Сол себепті үйде болсаңыз да намазға тұрғанда ұзын, әрі тырыспаған белдемше (юбка) немесе көйлек киюыңыз қажет.
материал «Заман тудырған сұрақтар» кітабынан алынды,
ummet.kz
