13 тамыз. АСТАНА. Ummet.kz – Қытай елінің Нинся провинциясындағы Вэйчжоу Орталық мешітін билік өкілдері заңсыз салынған деп тауып, жақында сүріп тастауға шешім шығарған еді, деп хабарлайды muslim.kz сайтына сілтеме жасаған ummet.kz тілшісі.
Нинся провинциясы билігінің бұл шешіміне қатысты құқыққорғаушылар ұйымдары мұсылмандарға жасалған тағы қысым түрі деп байбаламдаудан басқа айтары болмай отыр. Ал, провинция басшылары болса, Вэйчжоу мешітінің сәулеті қала келбетіне сәйкеспейді дегенді уәж қылып алға тартуда.
Алайда, құлшылық ордасының сүріліп тастауына жергілікті мұсылман қауымы қарсылық танытып, 9-тамыз күні Орталық мешіт жанында наразылық шеруін өткізді. Бесін намазынан бастап кеш түскенге дейін мешіт алдынан тарқамаған наразылық шеруі ақыр соңында провинция басшыларының әзірге құлшылық ордасын бұзбау туралы уәдесіне қол жеткізген.
