«Әбу Насыр әл-Фараби» мешітінде әлемдегі пайғамбарлардың ең соңғысы және ең үстемі Мұхаммед пайғамбар (с.ғ.с) дүниеге келген Мәуліт мерекесінің құрметіне орай жамағатқа арналған ақ дастархан жайылды.
Мешіттің наиб имамы Нуриддин Абдусамадұлы «Мәуліт мерекесін атап өтуге бола ма?» тақырыбында көркем насихат айтып, Мәуліт мерекесінің Ислам дініндегі қадір-қасиетіне кеңінен тоқталды.
Пайғамбарымызға (с.ғ.с) сағынышты салауаттар айтылып, мешіт азаншысы Алтынбек Аманжолов «Мәуліт жырының» қазақша нұсқасын жамағатқа оқып берді. «Мәуліт жыры» – пайғамбардың дүниеге келуін, миғражы мен өмірі туралы айту, оны еске түсіру, оны мадақтау дегенді білдіреді.
Жиылған жамағат осындай әсерлі де, әдемі басқосуды ұйымдастырғаны үшін мешіт ұжымына зор ризашылықтарын айтты.
ummet.kz
